یمن کی مسلح افواج کے ترجمان بریگیڈیئر جنرل یحییٰ سریع نے ایک بیان میں جنوب مغربی یمن میں حالیہ کارروائی کی تفصیلات جاری کیں۔ بیان کے مطابق ”اللہ ہر طرف سے ان کا احاطہ کیے ہوئے ہے“ کے عنوان سے کی گئی کارروائی کے نتیجے میں تعز اور لحج کے صوبوں کے 10 اضلاع کو محفوظ بنایا گیا، جن کا مجموعی رقبہ 7100 مربع کلومیٹر ہے۔
بیان میں کہا گیا ہے کہ سعودی افسر محمد طلال البلوی کی نگرانی میں تعینات سعودی دشمن فورسز کی 12 فوجی ڈویژنوں، جن میں 60 بٹالین شامل تھیں، کو شکست دے کر تباہ کر دیا گیا۔ مزید برآں، سیکڑوں فوجی اور بکتر بند گاڑیوں، بڑی تعداد میں ہتھیاروں، گولہ بارود اور فوجی سازوسامان کو تباہ، ناکارہ یا غنیمت میں حاصل کیا گیا۔
یحییٰ سریع نے واضح کیا کہ کارروائی کا مقصد ان علاقوں کو محفوظ بنانا تھا جہاں سعودی دشمن فورسز اپنے فوجی افسران کی قیادت میں یمنی عوام اور مسلح افواج پر حملے کر رہی تھیں۔ انہوں نے کہا کہ جنوبی صوبے بھی سعودی حملوں سے متاثر ہوئے ہیں اور یمن کی مسلح افواج نے یہ کارروائی ملک اور عوام کے دفاع کے لیے انجام دی ہے، جنوبی صوبوں پر حملہ کرنا اس کا مقصد نہیں تھا۔
یمنی مسلح افواج کے ترجمان نے جنوبی صوبوں کے تمام یمنی باشندوں سے اپیل کی کہ وہ سعودی عرب کے خلاف اپنی آواز بلند کریں اور ان صوبوں کو یمنی عوام کے خلاف سعودی دشمن کے مذموم اور ناپاک عزائم کے لیے اڈے کے طور پر استعمال نہ ہونے دیں۔ بیان کے آخر میں جنگ کے خاتمے اور یمن کا محاصرہ ختم ہونے تک ”محاصرے کے مقابل محاصرہ، کشیدگی کے مقابل کشیدگی“ کی مساوات کے تحت سعودی اہداف کو نشانہ بنانے اور ہتھیاروں کی تیاری میں توسیع کے عزم کا اظہار کیا گیا۔



