اسلامی جمہوریہ ایران نے کہا ہے کہ وہ ایک ذمہ دار ملک کی حیثیت سے اور آزادانہ طور پر فنی معاملات کی تحقیقات کے دائرے میں یوکرینی طیارے کو پیش آنے والے سانحے کے سلسلے میں جواب دہ ہے اور شکست خوردہ عناصر کے جعلی دباؤ اور سیاست بازی کا شکار نہیں ہوگا۔
ایران کی وزارت خارجہ کے ترجمان سعید خطیب زادہ نے پیر کو صحافیوں کے ساتھ اپنی ہفتے وار پریس بریفنگ میں یوکرین کے طیارے کو پیش آنے والے سانحے کے بارے میں کہا کہ اس سانحے کے ملزمین کے سلسلے میں عدالتی مراحل انجام پا رہے ہیں اور آئین کے مطابق اس کا سلسلہ سنجیدگی کے ساتھ جاری ہے۔
